MENDIKO TRESNAK ERABILTZEKO ETA ALOKATZEKO ARAUAK

1- Materiala edo tresneria bazkideek, ez bestek, erabil dezakete eta eskatu duenak baino ezin dezake erabil; beste inori ematea edo uztea guztiz debekatua dago.
2- Tresnak jasotzeko, Taldekide-txartela eta urteko ordain-agiria aurkeztu behar ditu, ezinbestez.
3- Tresnak erabiltzeko lehentasunak honako hauek dirateke.
a) Taldeak berak eratutako ibilaldiak.
b) Taldeak eratutako ikastaroak.
c) Ibilaldi,kanpaldi, ikastaro eta egintza federatuetako esku-hartzaileak.
d) Goi Mendirako espedizioak.
e) Bazkideen beren jarduerak.
4- Bazkide bakoitzak beretzako, ez besterentzako, tresnak baino ezin aloka ditzake, eta haietazko erantzunkizuna berea izango du.
5- Tresnak alokatzea, jasotzea eta itzultzea astearte-ostiraletan egin behar da, Taldearen elkartokian -Ruperto Urkijo 5-, zabalik dagoen orduetan.
6- Eskatu orduan, erabiltzeko egunak jakinarazteaz gain, dagokiona ordainduko du.
7- Tresnoz jabetzean, eskatzaile-erabiltzaileak aztertu behar ditu eta okerrik egonez gero Taldeko Arduradunari ohartarazi behar dio, zeren, bestela itzultzean bera erantzule izanen baita.
Galdu edo hondaturiko tresnak, oharteman eta kontuan hartu ondoren, erabiltzaileak bere kabuz berkonpondu behar izango ditu.
8- Tresnak itzultzeko eguna, erabil eta amaitu ondoko asteartea edo ostirala izanen da. Hau bete ezean, erabiltzaileak itzuli arteko egunak ordainduko ditu, erabili izan balitu bezala.
9- Sokak, Taldeak berak eratutako ibilaldietan soilik eta Zuzendaritzak egokietsiz gero besteetan erabil daitezke; mendian erabiltzen ikasteko ere erabil daitezke, Zuzendaritzaren zainpean.
10- Honako arauok ez betetzeak zehatua edo zigortua izatea dakarke, eta honetarako Zuzendaritza Batzak, Arautegiko legez, gertaturikoa ikertuko du.
11- Arauotan ez dagoena Zuzendaritza Batzak erabakiko du.

OHARRAK.
Goikogane M.T-ak., kirol taldea den aldetik, ez du erantzukizunik izango tresnak erabilketan jazo edo gerta litekeen ezein ezbehar edo istriputan, ez eta bere Zuzendaritza Batzak ere.

ATERPETXEA ERABILTZEKO ARAUAK

1.- ERABILERA

1.1.- Aterpetxea bazkide guztiek erabil dezakete, urteko ordaina kitaturik.
1.2.- Erabiltzeko eskaera elkartokian egin behar zaio, astearte-ostiraletan, arduradunari, bazkide-txartela aurkeztuta.
1.3.- Eskaera egitean dagokiona ordainduko da eta honen baieztagiri bat jasoko. Aldi berean , bazkideari aterpetxean betetzeko txostengai bat emango zaio eta harako giltz bat ere bai, hau ez balego dadukanaren edo aterpetxean dagoen beste bazkide baten izena jakinaraziko zaio.
1.4.- Edozein bazkidek, beharreko baimenik gabe erabiliko edota lagunik eroango balu, dagozkion ordainak beteko ditu % 50a gehiturik eta egitada kontuan hartua izanen da legozkiokeen zehapenak ebazteko.
1.5.- Erabil-baimenak berekin aterpetxearen gaineko erantzukizunen onartzea dakar, dagokien atalean zehaztuko direnak.
1.6.- Aterpetxea mendizaletasuna goza eta bizitzeko erabiliko da, batik bat , haren egikera guztietan.

2.- ERABILTZAILEAREN ESKUBIDEAK

2.1.- Erabiltzaile denak aterpetxea egoera on-onean aurkitzeko eskubidea du.
2.2.- Orokorrak diren zerbitzu guztiak erabiltzeko eskua du.
2.3.- Gaueko 11etan ezarritako isil-ordua errespetatzekoa.

3.- BEHARKIZUNAK

3.1.- Aterpetxean sartutakoan sarrera-agiriari dagokion atala betetzea, honetan eskatzen diren datu guztien berri emanez, eta bertan okerrik aurkituz gero aditzera ematea. Etxetik alde egiterakoan irteerari dagokion atala betetzea.
3.2.- Leku eta tresnen garbiketa. Zerbitzuetarako papera, zabor-poltsak eta garbigarriak (xaboia, ehea, zapiak, etab.) erabiltzea beharrezkoa da.
3.3.- Erretako beste egur ekartzea.
3.4.- Ekoiztutako zaborrak-eta menditik beheratu ondoan kalean dagozkien tokian uztea.
3.5.- Zuhaitzik moztea debekatua.
3.6.- Ez aldatzea altzaririk, burusirik, lastairarik etab. aterpetxeko lekuz leku, ez erabiltzea gas-argiontzirik ez kandelarik logeletan.
Etxean dauden tresna eta erabilgai guztiak dagozkien lekuan utzi behar dira, ibiliz gero.
3.7.- Barruan inolako abererik ez sartzea; erabat debekaturik dago su-iskilo edo armarekin sartzea.
3.8.- Isil-ordua, gaueko 11etan, errespetatzea, aterpe dagozen guztiek batera bestelakorik erabaki ezik.
3.9.- Egote-agiria, behar bezala bete eta izenpeturik, eskura ematearekin batera giltza elkartokira itzuli behar da. Agirian, bai aurkitu bai gertatu ote zitekeen edozein oker jakinarazi behar da.
3.10.- Jaikitzeko ordua 9etan ezarri da baina goizagotu egin daiteke txango joate aldera gainontzeko mendizaleei nahiezik eragin gabe, egun argiz logeletan egotea debekatua delarik.
3.11.- Sukal-tresnak erabiltzen diren guztian ikuzi beharra dago, eta bai afaritarakoak bai gosaritarakoak ikuzteke lotara nahiz txangora joatea erabat debekaturik ere dago.
3.12.- Argi- zein ur-instalazioak aldatzea edo besteratzea erabat debekaturik dago, bai eta etxe barruan jolastea ere , era berean debekaturik logeletan jatea, erretzea edota janari, motxila zein oinetakorik uztea.
3.13.- Aretoan ez da egon behar jantzirik, motxilarik, oinetakorik eta janari nahiz jatondarrik , beti dagokion erabilerarako moduan egon behar baitu. Sukaldean, berriz, tresna garbiak baino ez da egon behar eta janaria , bai erregosietakoa bai bildutako hondakinak.
3.14.- Alde egitean aterpetxea garbi geratu behar da eta janariz edota ontziz hutsik , leiho zein leiho-estalki guztiak itxita.
3.15.- Giltza elkartokian eman behar da erabili eta berehalako egunetako baten, astearte-ostiraletan.
3.16 Goiko atal hau bete ezean, gehiagoko egunak erabiliak izan baziren bezala ordaindu beharko dira.

4.- ZEHAPENAK

4.1.- Goiko arauok ez betetzeak zehatua izatekoa dakarke , hala gertaeraren larritasunagatik nola behin baino gehiagotan gertatzeagatik.
4.2.- Zehapen-mota, indarrean dagoen araudiaren arabera (7. artikulua), aterpetxea erabiltzeko eskubidea galtzetik elkartekide izateari utzaraztera joan daiteke.
4.3.- Goikogane M. T-k., aterpetxea erabiltzeko laka edo ordaina atxiki lezake, zati nahiz oso, eskaeran onarturiko arauak , gutiz edo guztiz, bete ez balitez eta ez erabiltzeaz gainontzeko erabiltzaileei kalte eginez gero.

5.- ATERPETXEKO AGINTEDUNA

5.1.- Aterpetxeko agintedun nagusia bertan den Zuzendaritza Batzako edozein kide da.
5.2.- Zuzendaritza Batzako inor ez bada, bertan diren erabiltzaile eta bazkide guztiak dirateke arduradun erantzule.
5.3.- Erantzukizun edo ardura izateak ez du haizu agintekeria eta honelakorik gerta baledi Zuzendaritza Batzara hel eginez jo liteke.
5.4.- Bazkideen Biltzarrak -beti burujabe- Ohiko Batzar Nagusian guztizko ahalbidea eman zion Zuzendaritza Batzari aterpetxea hobeto kudeatu ahal izateko arauok ezar ditzan.
5.5 .Arauotan ez dagoena Zuzendaritza Batzak ebatziko du, estatutuei men eginez.

ELKARTEAREN TALDE-IRTEERETARAKO ARAUTEGIA

Irteeretarako izenematea elkartearen egoitzan egingo dira buruz buru astearte zein ostiraletan 19:00ak eta 21:00ak bitartean, edota erantzungailuaren bidez 94 672 50 21 telefonora deituz, beti ere programaturiko irteeraren aurreko ostiralaren 19:30ak baino lehen.
Ostatua kontratatzea zein plaza gordetzeko ordainketa aurreratzea, e.a. behar duten irteera bereziak kasu bakoitzean jakinaraziko diren izenemate arauen bidez zuzenduko dira eta ekintza burutzeko gainontzekoan honako arautegi hau berau aplikatuko da.
Izenemateak, honakoa arautegi hau onartzea eta finkatzen den irteerarako kuota ordaindu behar izatea suposatzen ditu. Izenemateari uko egin dakioke eta ondorioz kuotaren ordainketa ezabatuko da; baina honetarako ukoa irteeraren aurreko ostiralaren 19:30ak baino lehen egin behar izango da.
Elkarteak antolaturiko talde-irteerak ez dira lehiaketa. Mendizale guztiak elkarrekin irten eta iritsiko dira, eta Zuzendaritzak adierazitako ibilbideari ekingo diote, behar orografiko, metereologiako edota ibilbidearen iraupenari aurre egiteko plantea litezkeen aldakiei so eginez.
Ibilbidea zehaztu ondoren mendizale talde batek berau zabaldu nahi duen irteeretan, egiteko aukera izango du baldin eta honako arau hauek errespetatzen baditu:
1.- Ekintzaren arduradunei azaldu behar izango diete, eta berauek onartu behar izango dute.
2.- Baieztapenak egun jakin horretarako ezarririko egitaraua bete ahal izatea izango du oinarri.
3.- Ez zaio inola ere pertsona bakar bati aldaketarik egitea.
4.- Pertsonentzako arriskuak ekar litzatekeen ibilbide zein ekintzak ez dira inola ere baimenduko, ezta egoera klimatologikoak aurkako zein arriskutsuak direnean ere.
5.- Emandako denbora epea errespetatuko da.
6.- Baimenduriko taldeak gainontzekoekiko nolabaiteko komunikabide sistema izateko ahaleginak egingo dira (telefono eramangarria, irrati-igorgailua). Honela izanik edozein gertakariren berri emango zaie irteeraren arduradunei, beharreko erabakiak har ditzaten.
7.- Arau hauen arteko baten bat ez betetzea hutsegite larritzat hartuko da, eta aurrerantzean berriz ez errepikatzeko neurriak hartzeko bidea ematen dute.
Mendi irteera doazen zuzendaritza taldeko kide zein kideei ekitaldiaren kontrola badagokie ere, adin nagusiko kide guztiek hartu behar izango dute dagokien ardura apurra, guzti guztiok baikara elkarte honen giza egituraren partaide.
Egin ezazu zure esku dagoen guztia, mendi irteerak guztiontzat atseginak izan daitezen.